قصة جحا والحمار

تعالى اقولك علي قصة جحا والحمار

في يوم من الايام جحا كان عايز يشتري حمار فراح السوق ووقف عند حمار عجبة وقال لصاحب الحمار بعد ما فضل  يفاصل في سعره هي دي كل الفلوس الي معايا يا اما تبيع لي الحمار يا اما هامشي

فوافق الراجل واخد جحا الحمار ومشي . شافه اتنين حرامية واتفقوا انهم يسرقوا الحمار من جحا

فواحد منهم جه من ورا جحا من غير ما يشعر به وفك الحبل من رقبة الحمار وربط رقبتة هوه بالحبل . كل دة وجحا مش واخد باله من الي بيحصل . وفضل الحرامي ماشي ورا جحا والحرامي التاني اخد الحمار وهرب.

وكل الي يشوف جحا يضحك علي منظره وهو ساحب الراجل بالحبل وجحا مستغرب وبيقول لنفسة اكيد الناس دي بتضحك علشان معجبة بالحمار الي انا اشتريتة

ولما وصل جحا للبيت بص وراة علشان يشوف الحمار لقي راجل مربوط في الحبل من رقبته فاستغرب وقال لة انت مين فبكي الحرامي ومسح دموعه وقال له انا راجل جاهل وزعلت امي مني . فدعت عليا وطلبت من ربنا انه يسخطني حمار فربنا استجاب لدعاوتها فلما شفني اخويا الكبير اخدني وباعني في السوق وجيت انتا اشترتني وببركتك وطيبتك رجعت انسان زي ما كنت 

وفضل الحرامي يبوس ايد جحا ويشكره فصدقة جحا ومشاه بعد ما نصحه انه يطيع امه ويطلب منها انها تسامحه

وتاني يوم راح جحا للسوق علشان يشتري حمار فشاف الحمار نفسة فعرفه فقرب جحا من ودان الحمار وقال له  شكلك ماسمعتش كلامي امبارح وزعلت امك . والله ما هشتريك ابدا

ولحد هنا خلصت قصة جحا والحمار