لو بتفكر تشطب شقتك ومش عارف تعمل اية او تبدأ بإية تعالي اقولك

لو بتفكر تشطب شقتك ممش عارف تعمل اية او تبدأ بإية

تعالي اقولك

هنفترض ان شقتك حالياً علي الطوب الاحمر

بص ياسيدي اول حاجة هتعملها هي انك تجيب سباك .. لية؟؟
 علشان لو جبت الكهربائي الأول هيعملك الشقة كلها ويسيب المطبخ والحمام لحد ما السباك يركب المواسير ويحدد اماكن الاحواض والغسالات وحاجات تانية كتييييييير

السباك هيجي وخلي بالك اختار اجود انواع المواسير سواء مياة او صرف ودا تقدر تعرفة من السباك الي هيعملك شقتك وهقولك تختاره ازاي السباك يعتبر من اهم الناس الي هيشتعلو في شقتك فلازم تركز كويس في اختياره يعني فرضا انك تعرف سباك معين وليكن (م م) بس متعرفش شاطر ولا لا هنشوف السباك دة اشتغل فين قبل كدة وهل في حد اشتكي من شغلة قبل كدة وهل حصل مشكلة في اي شقة من الشقق الي اشتغل فيها وتقدر تعرف دة بكل سهولة  من الناس الي عمل لهم  شغل قبل كدة وبالتالي تقدر تختار صح

التكيف لازم تقرر هتعمل تكييف ولا  لأ ولو هتعمل حدد الاماكن الي هتعمل فيها التكيفات ومتخليش التكييفات تسقط مياة في الشارع اعمل وصلات صرف احسن

كدة الشقة جاهزة للكهربائي اختار الكهربائي بنفس طريقة اختيار السباك الي قلناها قبل كدة

حدد اماكن العفش بتاعك يعني مثلا  اوضة النوم حدد مكان السرير والدولاب والمكان الي هتحط فية الشاشة بتاعتك علشان يقدر يحدد لك الاماكن المظبوطة للفيش والاضاءة المناسبة وأماكن وصلات الدش والنت ومفاتيح الاضاءة تجنبا للتكسير بعد كدة وتغيير اماكن المفاتيح او تعمل حاجة زيادة  يعني تكون محدد كل حاجة قبل ما الكهربائي يشتغل ونفس النظام مع كل مكان في الشقة خلي بالك الكهرباء والسباكة اهم حاجتين في التشطيب يعني لازم تختار اجود انواع الخامات اوعي تسترخص في حاجة منهم لان الغلطة او التهاون هيكلفك كتير بعد كدة

خلصنا الكهرباء

هنا بقا لازم تقرر هتعمل ألمونتال والا نجارة لو نجارة هات النجار يركبلك الحلوق

لو ألمونتال عنده طريقتين الاولي انك تركب حلوق خشب ودي بتبقي مسمطة عبارة عن الواح سادة مفيش فيها اي حلية او فريز الطريقة الثانية هي انك  تعمل مكان الحلوق بلاط او رخام

وبكدة يبقي جاهز للمحارة وبتختار صنايعى المحارة بنفس طريقتك في اختيار السباك

وخد بالك دايما تجيب الاسمنت بالطلب يعني متقلش اجيب كمية كبيرة والي يفضل منه ارجعه لا لأن الاسمنت بيبوظ بسرعة خصوصا في الشتاء او الاماكن الي فيها الرطوبة عالية لكن الرمل هات بزيادة مش هيخسر معاك حتي لو فضل منه كمية كتير .
خلصت محارة

شوف انتا تحب تعمل جبس بلدي ولا جيبسنبورد  لو هتعمل شغل كلاسيك فيه اويمة يبقي بلدي والشغل المودرن ممكن بلدي او جبسنبورد .  خلصت الجبس

هات الكهربائي والسباك ويشوفوا كل حاجة سليمة والا في حاجة محتاجة تعديل وتشوف البانيو  هتعمله عادي مدفون ولا فوق البلاط لو فوق البلاط السباك بيجهز وصلاتة ويجهز الحمام للمبلط لو عادي مدفون بتنسق معاة ومع المبلط علشان يجيلك يركبة والمبلط شغال عندك اتأكدت ان كل حاجة سليمة تمام

المرحلة الي عليها الدور مرحلة البلاط واختيارك للصنايعي برضه بنفس الطرق الي فاتت

وحاول تجيب البلاط بزيادة متر والا اتنين لكل نوع بلاط عندك ولما الصنايعي يبدأ خللي الاسمنت برضو بالطلب

لما المبلط يقرب يخلص حوائط الحمام بييجي السباك يركب البانيو وبعد كدة المبلط يكمل شغله ولو هاتعمل ألمونتال طبعا انت مقرر من قبل المحارة لو مركبتش الحلوق الخشب المجهزة للالمونتال الي قلنا عليها قبل كدة  يبقي لسة قدمنا اختيارين اللي منهم البلاط  يبقي لو اختارت الاختيار ده المبلط هيعملهولك وهو موجود

وبكدة يبقي  خلصنا البلاط لو هتركب المونتال يبقي المرحلة دي لسة ماجاش وقتها

لو نجارة يبقي دي المرحلة الي عليها الدور هات النجار وطبعا عرفنا هنختاره ازاي

خلصنا يبقا دور رخام المطبخ ولو في الحمام رخام

وبعد كدة النقاشة والديكور وبرضو هنختارة بنفس الطريقة

وطبعا انت مقرر من قبل كده اماكن العفش بتاعك علشان تختار الاماكن الي هيتعمل فيها الخلفيات او الرسم او الديكور المطلوب

وبكده يبقي وصلنا للمراحل الاخيرة الكهرباء النهائية والسباكة النهائية

ولو كنت اختارت انك تعمل المونتال يبقي دة وقته  

وعلشان تجيب عفش يتناسب مع شقتك يبقي لازم تكون عارف مقاس كل مكان في شقتك وانت بتشتري العفش

وفي الختام

يبقي كدة عرفنا ازاي نختار الصنايعية والخطوات بالترتيب الصحيح

ملحوظة
 الاتفاق مع الصنايعية في كل شيء قبل العمل شيء لابد منه زي  مواعيد التسليم والاجرة المطلوبة لاتمام العمل والاجرة مقسمة علي دفعات

دفعة مقدمة ودفع علي فترات اثناء العمل والدفعة الاخيرة بعد الانتهاء من العمل نهائيا